Lombardların fəaliyyətinə dair təklif olunan yeniliklər açıqlanıb

Oxunma sayı: 418
20-11-2020, 18:02

Lombardların fəaliyyətinə dair təklif olunan yeniliklər açıqlanıb
“İşçi qrup tərəfindən “Lombardlar haqqında” qanun layihəsi üzərində təkmilləşdirmə işləri aparılıb”.

Bunu APA-ya açıqlamasında Milli Məclisin İqtisadi siyasət, sənaye və sahibkarlıq komitəsinin sədr müavini, “Lombardlar haqqında” qanun layihəsinin üçüncü oxunuşa hazırlanması üzrə İşçi Qrupunun rəhbəri Əli Məsimli deyib.

Komitə sədrinin müavini bildirib ki, bu işlər əsasən iki istiqamətdə aparılıb: “Birincisi, lombard xidmətlərindən istifadə edən borcalanın hüquqi müdafiəsinin gücləndirilməsidir. Bununla artıq lombard tərəfindən kənar şəxslərdən maliyyənin yalnız təminat müqabilində cəlb edilə bilməsi mümkün olacaq. Eyni zamanda verilən kreditlərə görə faizdən başqa hər hansı ödənişin, xərcin tələb olunması, kreditlər üzrə müştərinin öhdəliyinin xarici valyutaya indeksə olunması qadağan ediləcək. Həmçinin qüvvədə olduğu müddətdə kredit müqaviləsinin şərtlərinin müştərinin ziyanına dəyişdirilməsinə yol verilməyəcək. İkincisi, lombardların fəaliyyətinin təhlükəsizliyinin gücləndirilməsi və dövlət nəzarəti altına alınması ilə əlaqədar tənzimləmə və nəzarət proseslərinin sadələşdirilməsidir. Bununla lombard fəaliyyətinə icazənin lisenziyalaşdırma yolu ilə deyil, Mərkəzi Bankda xüsusi reyestrə daxil edilməsi və lombard şəhadətnaməsi verilməsi ilə dövlət nəzarətə götürüləcək”.

Deputat nəzərə çatdırıb ki, qanun layihəsinin yeni redaksiyasına əsasən, Azərbaycanda lombardlara nəzarətdəki boşluq aradan qalxacaq, onların fəaliyyəti qanunla tənzimlənəcək: “Lombardın nizamnamə kapitalının minimum miqdarına dair tələblər Mərkəzi Bank tərəfindən müəyyən olunacaq. Hazırda Azərbaycanda qeydiyyatdan keçmiş 700-dən artıq lombard fəaliyyəti ilə məşğul olan təsərrüfat subyekti müəyyən edilsə də, onların real sayı məlum deyil. Azərbaycan Respublikasının ərazisində fəaliyyət göstərən lombardlar Mərkəzi Bankda qeydiyyatdan keçib reyestrə daxil ediləcək”

Paylaş
Xəbər lentİ