Gülər Əhmədova Ramiz Mehdiyev mövzusunda onun adını hallandıranlara od püskürdü

"Ramiz Mehdiyevin uzun illər məndən zəhləsi gedib, səbəbi isə..."
Sabiq deputat Gülər Əhmədova Prezident Administrasiyasının eks rəhbəri Ramiz Mehdiyev mövzusunda adının hallandırılmasına kəskin etiraz edib.

Musavat.com xəbər verir ki, o, bu barədə sosial şəbəkədəki statusunda AzeriFreedom kanalının rəhbəri Qurban Məmmədova müraciət edib.

Müraciəti olduğu kimi yayırıq: "Qurban müəllim, qulaq asdım anonsunuza. Bu günə qədər çoxsaylı məsuliyyətsiz,bol emosiyalı,faktsız,sənədsiz, "fake" məlumatlar paylaşmısınız ki, indi onların altından çıxmaq çətindir. Başa düşürəm. Amma neyləmək olar. Həyatdır. Ümumiyyətlə, avantürizm və qisasçılıq, habelə özünü hamıdan üstün, ağıllı görmək, təkəbbür heç kimi yaxşı bir sonluğa gətirmir. Siz bir tərəfdən artıq dövlətə təslim olmaq, bir Robin Qud kimi digərlərini xilas edərək özünüzü tək təqsirkar kimi elan edirsiniz, digər tərəfdən də məni, işgəncə ilə həbs olunmuş qadını yenə də şərləyirsiniz. Ən azı, ayıbdır.

Siz, tələsməyin, gəlin Bakıya, öz günahlarınıza cavab verin, mənim üçün narahat olmayın".

G.Əhmədova daha sonra Q.Məmmədova müraciətlə yazıb ki, əziz dostunuz Əli Həsənovun tapşırığı ilə bu vicdansız və qorxunc yalan 2012- ci ildən bütün mətbuat vasitəsi ilə dövriyyəyə buraxılıb. Respublika Prokurorluğu, Bakı şəhər prokurorluğu, böyük professionallıq və həvəslə araşdırdı və bu nəticəyə gəldi ki, qadın(Sevinc Babayevanı nəzərdə tutur-müəl.) öz əcəli ilə rəhmətə gedib, uzun illər Bakıda müalicə alıb, infarkt keçirdib: "Türkiyə hüquq-mühafizə orqanları 6 aydan sonra göndərdiyi ekspertiza rəyi mətbuata açıqlandı. Məni qatil elan etmək istəyənlər yeni hoqqalardan çıxmasınlar deyə mərhumun ürəyi və ağ ciyəri Türkiyədə saxlanıldı.

Mənim bu məsələlərdə günahsızlığım çoxdan sübut olunub. Əks halda, keçmiş dostlarınız mənim qanımı çay qaşığı ilə içib, söz verdikləri kimi 15 illik edəcəkdi. Allah böyükdür, çox şükür.

İndi sizlər, ağsaqqal kişilər, bir ayağınız burda, bir ayağınız gorda, utanmazcasına dəliqanlılıq edib ağzınıza gələni danışırsınız, yalanla doğrunu elə qatışdırmısınız ki, şeytan da baş aça bilmir. Nə deyim vallah...

Mənim sizə kafa tutacaq nə həvəsim, nə də sağlamlığım. Bu türlü-türlü avantürist yalanlarınıza görə siz də, keçmiş dostlarınız da həm burda, həm də ötəki dünyada cavab verəcəksiniz. Sizə və sizin keçmiş dostlarınıza yalnız bir söz verə bilərəm. Axirətdə,nə qədər savabınız varsa, əlim boğazınızda, sizdən alacağam. Şər- böhtan deyənin axirətdə savabları şərlədiyi şəxsə yazılır, inşallah. Bakıda görüşənədək. Salamat qalın".

G.Əhmədova sonda Ramiz Mehdiyevin əleyhinə ondan və Sevinc Babayevanın ölümündən istifadə etmək istəyənlərə də müraciət edib: "Bu temada "çörək yoxdur" Bilən adamlar bilir ki, Ramiz Mehdiyevin uzun illər məndən zəhləsi gedib. Niyəsini də bilənlər bilir... O səbəbdən, R.Mehdiyevlə vuruşmaq üçün əsaslı faktlar tapın. Adam 30 il idarəçilikdə məşğul olub, bir ciddi siyasi, iqtisadi faktla ortaya çıxa bilmirsiniz. Çevir tatı, vur tatı.. Alınmadı da ... şərləmək və heç nə sübut olunmadı. Arada məni və ailəmi bədbəxt elədiniz, Allah şər danışanların evini yıxsın. Necə ki, yıxır..."