Azərbaycanda mənimsəmədə təqsirləndirilən vəzifəli şəxs öldü

Azərbaycan Qızıl Aypara Cəmiyyətinin Bərdə rayon bölməsinin mənimsəmədə təqsirləndirilən sabiq sədri Xanlar İsmayılov vəfat edib.

Arasdırma.info "report"a istinadla xəbər verir ki, bu barədə X.İsmayılovun cinayət işi üzrə keçirilən məhkəmə prosesində bildirilib.

Belə ki, Bərdə Rayon Məhkəməsində araşdırılan cinayət işində təqsirləndirilən şəxsin istintaq dövründə - 2021-ci ilin noyabr ayının 1-də kəskin respirator çatışmazlığı xəstəliyindən öldüyü qeyd edilib.

Məhkəmənin qərarı ilə X.İsmayılovun cinayət işinə xitam verilib.

Qeyd edək ki, Azərbaycan Qızıl Aypara Cəmiyyətinin Bərdə rayon bölməsinin sədri olmuş, 1958-ci il təvəllüdlü X.İsmayılov 2021-ci ilin may ayında Baş prokuror yanında Korrupsiyaya qarşı Mübarizə Baş İdarəsinin əməkdaşları tərəfindən saxlanılıb.

Aparılan ilkin istintaqla X.İsmayılov 2012-ci ildən işlədiyi müddət ərzində ünvanlı sosial yardım almaları üçün qanunvericiliklə müəyyən edilən tələbin - rəsmi iş yerinin olmasının təmin edilməsi ilə əlaqədar ona müraciət edən müxtəlif şəxslərin adlarını işçi kimi rəsmiləşdirmək müqabilində onların əmək haqqı kartlarını özündə saxlamaqla, həmin əmək haqqı kartlarına daxil olan vəsaiti hər ay nağdlaşdıraraq, külli miqdarda pul vəsaitini mənimsəyib.

İstintaq dövründə X.İsmayılovun barəsində Cinayət Məcəlləsinin 179.2.3-cü (Mənimsəmə və ya israf etmə, şəxs tərəfindən öz qulluq mövqeyindən istifadə etməklə törədildikdə), 179.2.4-cü (Mənimsəmə və ya israf etmə, xeyli miqdarda ziyan vurmaqla törədildikdə) və 313-cü (Vəzifə saxtakarlığı) maddələri ilə ittiham irəli sürülüb.

Onun barəsində ev dustaqlığı qətimkan tədbiri seçilmişdi.