Öldürülən Zəvahiri kimdir: Ziyalı nəslin övladı, həkim-cərrah, amansız terrorçu

Oxunma sayı: 40
2-08-2022, 20:51

Öldürülən Zəvahiri kimdir: Ziyalı nəslin övladı, həkim-cərrah, amansız terrorçu
"Əl-Qaidə”nin öldürülən lideri Ayman əz-Zəvahirinin həyatına baxış.

Ayman əl-Zəvahiri 1951-ci ildə Qahirə yaxınlığındakı Məadi şəhərində anadan olub. Onun tam adı Ayman Məhəmməd Rabi Mustafa Əbdül Kərim əz-Zəvahridir və ailəsi Misirin şimalında yerləşən Əl-Şərqiyyə əyalətinin Hayya şəhərinin Kəfr əş-Şeyx əz-Zəvahri kəndində məskunlaşıb.

Qaynarinfo bu barədə "Alalam"a istinadən xəbər verir.

Ayman əl-Zəvahrinin atası 1995-ci ildə vəfat edən Ayn Şəms Universitetinin Tibb fakültəsinin əczaçılıq professoru Məhəmməd Rəbi əl-Zəvahridir.

Onun qardaşı Məhəmməd Rabih əl-Zəvahiri Əbu Əymən əl-Mesri ləqəblidir və Əl-Qaidə liderlərindən biridir. Kiçik qardaşı Hüseyn əl-Zəvahiri planlama mühəndisi, bacısı Heba əl-Zəvahiri isə onkologiya üzrə Qahirə Universitetində Milli Xərçəng İnstitutunda professordur.

Onun ana tərəfdən babası Əbd əl-Vəhhab Əzzam yazıçı və Əl-Şərqiyyə Universitetində ədəbiyyat professoru, Qahirə Universitetinin İncəsənət fakültəsinin rəhbəri və Qahirədə Ərəb Dili Akademiyasının üzvü olub.

Məlumatlara görə, Zəvahiri 1974-cü ildə Azza Əhmədlə ailə həyatı qurub. Onun bu birlikdən dörd qızı, bir oğlu olub. Ayman əz-Zəvahirinin həyat yoldaşı, oğlu və bir qızının 2001-ci ildə ABŞ-ın hava hücumlarından birində öldürüldüyü bildirilir.

Həkim-cərrah olan Ayman əl-Zəvahiri 1975-ci ildə bitirdiyi tibb fakültəsinə qatılmadan əvvəl, 60-cı illərin sonlarında Əl-Cihad Təşkilatına və ondan əvvəl Misir Müsəlman Qardaşlarına (Ixvan Əl-müslimim) qoşulub.

O, 1981-ci ildə Misirdə qanunsuz silah saxlamaq ittihamı ilə həbs olunub üç il həbs cəzasına məhkum edilib. 1985-ci ildə azad olunub.

O, səksəninci illərin ikinci yarısında Əfqanıstana gedib, orada Bin Ladenlə tanış olub və Əl-Qaidəyə qoşulub.


Bin Laden öldürülməzdən əvvəl o, Əl-Qaidə şəbəkəsinin ikinci komandiri olub və deyilənə görə, 7 avqust 1998-ci ildə Amerikanın Darol-Salam (Tanzaniya) və Nayrobidəki (Keniya) səfirliklərində törədilən partlayışlar zamanı, USS Cole döyüş gəmisinə hücumda, 2001-ci ildə Dünya Ticarət Mərkəzinə və Pentaqona 11 sentyabr hücumunda xüsusi rol oynayıb və beynəlxalq axtarışa verilib.

BMT Təhlükəsizlik Şurasının 1267 saylı qətnaməsinə əsasən, Ayman əl-Zəvahiri "Əl-Qaidə”nin effektiv üzvü olduğu üçün "qara siyahı”ya salınıb və ona sanksiya tətbiq edilib.

Həmçinin ABŞ Dövlət Departamenti onun həbsinə və ya ölümünə səbəb olacaq məlumatlara görə 25 milyon dollar pul mükafatı təklif edib.

Qeyd edilir ki, Zəvahiri bazar günü ABŞ ordusuna məxsus hərbi dronla Kabildə yerləşdiyi evdə hədəfə alınaraq öldürülüb.

ARAYIŞ

Qeyd edək ki, ABŞ tərəfindən Əfqanıstanda keçirilən antiterror əməliyyatı nəticəsində "Əl-Qaidə” terror təşkilatının başçısı Ayman əl-Zəvahiri öldürülüb. 71 yaşlı Ayman Əl-Zəvahiri ABŞ-da törədilən 11 sentyabr terror aktının təşkilatçısı olaraq bilinirdi. O, Usamə bin Ladenin məhv edilməsindən sonra "Əl-Qaidə”yə rəhbərlik edirdi.

ABŞ Prezidenti Co Bayden Ayman əl-Zəvahirinin öldürülməsini təsdiqləyib: "Ədalət bərqərar oldu və bu terrorçu lider artıq yoxdur. Nə qədər vaxt aparsa da, harada gizlənsəniz də, xalqımız üçün təhlükə olsanız, Birləşmiş Ştatlar sizi tapıb çıxaracaq. O, Amerika vətəndaşlarına, Amerika hərbçilərinə, Amerika diplomatlarına və Amerika maraqlarına qarşı qətl və zorakılıq izini qoydu”.

Paylaş
Xəbər lentİ