Qlobal dəyişiklik başladı: İxtisar dalğası enerji sektoruna da çatdı

Dünyada mədənlərin bağlanması planları, bazarın ucuz və təmiz enerji mənbələri olan külək və günəş enerjisi sektoruna çevrilməsi səbəbindən 2050-ci ilə qədər təxminən 1 milyon mədənçi iş yerini itirəcək.

Arasdırma.info Teleqraf.com-a istinadən xəbər verir ki, bunu beynəlxalq beyin mərkəzi “Global Energy Monitor” (GEM) proqnozlaşdırıb.

Bildirilir ki, dünyada fəaliyyət göstərən kömür mədənlərində birbaşa olaraq 2,7 milyon mədənçi çalışır. Kömür sənayesinin 2035-ci ilə qədər təxminən yarım milyon insanı işdən çıxaracağı proqnozlaşdırılır. Bu, gündə orta hesabla 100 işçinin işdən çıxarılma riski ilə üzləşməsi deməkdir.

Kömür mədənlərində ümumi məşğulluğun 2,2 milyonu Asiyada olsa da, mədənlərin bağlanmasından ən çox Çin və Hindistanda məşğulluğun təsirlənəcəyi proqnozlaşdırılır.

Dünya kömür hasilatının yarısından çoxunu təşkil edən Çində mədənlərdə 1,5 milyondan çox mədənçi çalışır. Rəsmi qeydlərə görə, dünyanın ikinci ən böyük kömür istehsalçısı olan Hindistanda 337 min 400 mədənçi çalışır.

Bu iki ölkəni 160 min mədənçi ilə İndoneziya, 109 min nəfərlə Rusiya və 90 min nəfərlə Avropa izləyir ki, bunun da əksəriyyəti Polşadadır.

Hindistanın dövlət şirkəti olan “Coal India” 2050-ci ilə qədər 73 min 800 nəfəri işdən çıxarma riski olan şirkətlər arasında birinci yerdədir.

Türkiyədə mədənlərdə təxminən 12 min adamın işlədiyi və 2050-ci ilə qədər 2 min mədənçinin işsiz qalacağı təxmin edilir.