“MEHDİYEV AZƏRBAYCAN ELMİNİN “DİLİNİ KƏSİB"" - "AMEA məhv olur, elm ocağında alver baş alıb gedir"

“AMEA prezidenti Ramiz Mehdiyevin xalqımıza xidmət edənlərdən nə istədiyini anlaya bilmirəm. Bu adam Azərbaycan elmini məhv edir”.

Bu sözləri Reyting.az-a siyasi elmlər doktoru, professor Cümşüd Nuriyev Azərbaycan Milli Elmlər Akademiyasında (AMEA) baş verən son qalmaqallardan danışarkən deyib.

Sabiq nazir müavini əlavə edib ki, AMEA-nın Tarix İnstitutunun baş direktoru vəzifəsindən istefa ərizəsi yazmış Kərim Şükürovu hələ tələbəlik illərindən tanıyır: “Bir yerdə oxumuşuq, bir yerdə qalmışıq. O, hələ tələbə olarkən, bir neçə dil öyrənirdi. Kərim müəllim Ali Attestasiya Komissiyasında da çox yüksək mədəniyyət göstərdi, gənclərimizə dəstək verdi, köməkliyini əsirgəmədi”.

C. Nuriyev eyni zamanda sual da verib: “Hanı AMEA-dakı akademiklər? Niyə səsləri çıxmır? Mən onların yerinə olsaydım, xəcalət çəkərdim. Çünki hər biri bu ölkənin, bu millətin ödədiyi vergi hesabına ayda əlavə 2 min manat maaş alır. Əgər akademiklərimiz bu qədər dinməzdirsə, onda vay bizim halımıza”.

C. Nuriyevin iddiasına görə, R. Mehdiyev Azərbaycan elmini məhvə sürükləyib, AMEA-nın “dilini kəsib”: “İndi akademiyada danışan yoxdur. Beş-altı alimi çıxmaq şərti ilə digərləri bu susqunluğa görə utanmalıdır. Çünki ziyalı haqsızlığa susmamalıdır”.

Professor bildirib ki, o, AMEA sistemində işləyən şəxslərdən R. Mehdiyevə qarşı çıxmağı tələb etmir: “Amma həqiqəti desinlər. Görmürlər ki, Ramiz Mehdiyev AMEA-nı necə idarə edir? Harada görünüb ki, akademiyanın elmi-tədqiqat institutunun həm baş direktoru, həm də icraçı direktoru olur? Qardaşım, AMEA məhv olur, elm ocağında alver baş alıb gedir. AMEA-da çalışanlar buna etiraz etməlidir. Bu qədər yaltaqlıq və qorxaqlıq olar?”

C. Nuriyevin fikrincə, AMEA-dakı özbaşınalıqlara siyasilərin qiymət verməsi boş şeydir: “Bizi ittiham edərlər ki, məsələyə siyasi yöndən yanaşırıq. Amma bu elm sahəsidir, adam elmi məhv edir, milləti uçuruma aparır. Bu susqunluqla sanki Mehdiyevə yalvarırıq ki, akademiyanı məhv elə. Alimlər niyə susur? Bunlar Ramiz Mehdiyevin nəyinə aşiq olublar? Elminə, savadına? Azərbaycanda başqa alim yoxdur?”

C. Nuriyev sonda diqqətə çatdırıb ki, AMEA sistemində normal bir neçə alimimiz olsa da, bu elm ocağımız çox pis durumdadır.