Kəlbəcərdə minaya düşmüş şəhid jurnalistlər anılıb - VİDEO

Azərbaycan Televiziyasının binasının qarşısında həlak olan media nümayəndələrinin xatirəsi yad edilib.

Anım mərasimində Medianın İnkişafı Agentliyinin icraçı direktoru Əhməd İsmayılov da iştirak edib.

“Bu gün həmkarlarımız iş başında olarkən minaya düşərək həlak olublar. Bu, Ermənistan tərəfindən bizim media nümayəndələrinə və mülki şəxslərimizə qarşı törədilən növbəti terror aktıdır.

Azərbaycan mediası olaraq bunu qətiyyətlə pisləyir və bütün beynəlxalq təşkilatları hadisəyə hüquqi qiymət verməyə çağırırıq”, - Ə.İsmayılov vurğulayıb.

Xatırladaq ki, bu gün Azərbaycan Televiziyasının operatoru 1989-cu il təvəllüdlü Sirac Abışov və “Azərtac”ın əməkdaşı Məhərrəm İbrahimov (Əlioğlu) Kəlbəcər rayonunda xidməti vəzifələrini yerinə yetirərkən minaya düşərək həlak olublar.